1444 ވަނަ އަހަރުގެ ޝަހީދުންގެ ދުވަހުގެ ރަސްމީ ޖަލްސާގައި ތުޅާދޫ ކައުންސިލްގެ ނައިބް ރައީސް މުޙައްމަދު އަލިމަނިކު އިތުރުފުޅު ހައްދަަވައިފިއެވެ.

ޝަހީދުންގެ ދުވަހުގެ ރަސްމީ ޖަލްސާގައި ނައިބް ރައީސް މުޙައްމަދު ޢަލިމަނިކު ވިދާޅުވީ، އެ ޖަލްސާގައި އެމަނިކުފާނަށް ހަވާލުކޮށްފައިވާ ޒިންމާއަކީ، ތުޅާދޫ ކައުންސިލްގެ 116 ވަނަ އާންމު ޖަލްސާއިން ނިންމާފައިވާ ނިންމުން އާންމު ކުރެއްވުން ކަމަށެވެ. އެގޮތުން ވާހަކަފުޅު ކުރިޔަށް ގެންދަވަމުން ނައިބް ރައީސް ވިދާޅުވީ ތުޅާދޫގައި އެޅުމަށް ހަމަޖެހިފައިވާ ޕޮލިސް ސްޓޭޝަންގެ ޢިމާރާތަށް “ޝަހީދު ހުސައިން އާދަމް” ގެ ނަމުން ނަން ދިނުމަށް 2023 ފެބްރުއަރީ 19 ވަނަ ދުވަހު ބޭއްވި ތުޅާދޫ ރަށުކައުންސިލްގެ 04 ވަނަ ދައުރުގެ 116 ވަނަ އާންމު ޖަލްސާއިން ތުޅާދޫ ކައުންސިލްގެ އެންމެހާ މެމްބަރުންގެ އިއްތިފާޤުން ފާސްކޮށްފައިވާ ކަމަށެވެ.

2023 ފެބްރުއަރީ 19 ވަނަ ދުވަހު ބޭއްވި ރަށުކައުންސިލްގެ 04 ވަނަ ދަޢުރުގެ 116 ވަނަ އާންމު ޖަލްސާއިން ނިންމާފައިވާ ނިންމުންތައް ތުޅާދޫ ކައުންސިލުގެ ވެބްސައިޓްގައާއި ކައުންސިލްގެ ނޯޓީސް ބޯޑުގައި ޢާންމު ކޮށްފައިވަނީ އެ ނިންމުންތައް ނިންމިތާ 07 ދުވަސް ފަހުން 2023 ފެބްރުއަރީ 26 ވަނަ ދުވަހުގެ މެންދުރުގެ ވަގުތެއްގައެވެ.

ޝަހީދުންގެ ދުވަހުގެ ރަސްމީ ޖަލްސާގައި އެތައް މެހެމާނުންނެއްގެ ކުރިމަތީ ނައިބް ރައީސް ވިދާޅުވި ގޮތަށް، 116 ވަނަ ޢާންމު ޖަލްސާއިން ނިންމާފައިވާ ނިންމުންތަކުގެ ތެރޭގައި، ބ.ތުޅާދޫގައި ބިނާކުރުމަށް ހަމަޖެހިފައިވާ ފުލުހުންގެ މަރުކަޒަށް “ޝަހީދު ހުސައިން އާދަމް” ގެ ނަމުން ނަންދިނުމަށް ނުވަތަ އެނޫން އެހެން ނަމެއް ދިނުމަށްވެސް ތުޅާދޫ ކައުންސިލުން ނިންމާފައެއް ނުވެއެވެ.

ނައިބް ރައީސް މުޙައްމަދު ޢަލިމަނިކު ވިދާޅުވީ، އެ ޖަލްސާގައި އެމަނިކުފާނަށް ހަވާލުކޮށްފައިވާ ޒިންމާއަކީ، ތުޅާދޫ ކައުންސިލްގެ 116 ވަނަ އާންމު ޖަލްސާއިން ނިންމާފައިވާ ނިންމުން އާންމު ކުރެއްވުން ކަމަށެވެ.

މިކަމާއި ގުޅޭ ގޮތުން ތުޅާދޫ އޮންލައިންގެ ފަރާތުން މަޢުލޫމާތު ހޯދާލުމަށް ތުޅާދޫ ކައުންސިލްގެ އިންފޮމޭޝަން އޮފިސަރ ޙުސައިން އިދުރިސް އަށް ގުޅުމުުން ވިދާޅުވީ، މީޑިއާއަށް އެއްވެސް މަޢުލޫމާތެއް ދެވޭނީ ލިޔުމުން އެ މަޢުލޫމާތެއް ހޯދުމަށް އެދުމުން ކަމަށެވެ. އަދި ޚަބަރު ޕަބްލިޝް ކުރުމުގެ ކުރިން އިތުރު މަޢުލޫމާތެއް ލިބޭތޯ ތުޅާދޫ ކައުންސިލްގެ ރަޢީސް އިބްރާޙީމް އާދިލް އަށް ގުޅުމުން ވިދާވީ، ތުޅާދޫ އޮންލައިންއާއި މެދު އެމަނިކުފާނުގެ ހިތްޕުޅުގައި ހިއްނުތަނަވަސް ކަމެއް އޮތަތީ ތުޅާދޫ އޮންލައިންއަށް މަޢުލޫމާތެއް ދެވެން ނެތްކަމަށެވެ.